Во акцијата во Кумановско повредени се тројца полицајци кои се донесени во скопскиот клинички центар, неофицијално дознава НОВА. Повредените не се во животна опасност и се сместени на КАРИЛ.
Официјални информации не се даваат, таква била наредбата. Никој од надлежните и задолжените за односи со јавноста не одговараат на телефонските повици. Во Министерството за здравство велат, сите информации, дури и за здравствената состојба на повредените, да се бараат во МВР.
Од утринава, од 7 часот мобилизирани се сите медицинските екипи на Хируршките клиники.
„Мобилизирани сме сите, но информации за повредените не смееме да даваме таква е наредбата, изјави кратко за НОВА, лекар од Ургентниот центар.
Според информации на Телма во престрелката меѓу полицијата и сè уште неидентификувана вооружена група утрово во Kуманово повредени се 12 полицајци, а меѓу нив неколку со тешки повреди.
Светлана Спасовска од Карил во Кумановската болница за телевизијата изјавила дека на тројца од полицајците им била укажана лекарска помош, но сите се пренесени во Клиничкиот центар во Скопје кој е под силно полициско обезбедување.
Засега нема официјални информации од МВР за акцијата што утрово започна околу 4 часот, oсвен дека резема мерки за разбивање на вооружена група во кумановската „Дива населба“ и апелот граѓаните да останат мирни.
Пукотниците во Куманово престанаа, но во градот влегуваат нови полициски сили со оклопни возила, јавува Телма.