Потпретседателот на ВМРО-ДПМНЕ и пратеник во Собранието, Александар Николоски вели дека не е изненаден од тоа што Владата ги одбива барањата на синдикатот за покачување на платите иако наставниот кадар е веќе четврти ден во штрајк и училиштата и градинките се празни, со образложение дека нема пари а од друга страна, склучуваат милионски договори во четири очи.
За време на неговата посета на општина Василево, одговарајќи на новинарски прашања Николоски истакна дека наставниот кадар и воопшто, вработените во градинките и училиштата се во право затоа што нивните плати се под секое достоинство и истите треба да им се зголемат.
„Би рекол дека не сум изненаден, мислам дека штрајкот е оправдан, сметам дека она што го бараат вработените во градинките, во основните и во средните училишта, она што го бараат воспитувачките, она што го бараат учителите и учителките, наставниците и наставничките, професорите и професорките и сите вработени во градинките, во основните, во средните училишта, во високото образование. Секако тука спаѓаат и оние кои што се во дејностите поврзани со нив е оправдано. Затоа што навистина платите сега се под секакво достоинство и под секакво нормално ниво и треба да бидат зголемени“, истакна Николоски.
Додаде дека ВМРО-ДПМНЕ има концепт за зголемување на платите на наставниот кадар кој ќе значи многу подобар квалитет на нивниот живот и дека истото решение ќе го поднесат во македонското Собрание.
„ВМРО-ДПМНЕ има свој концепт за зголемување на платите кои што ќе значи многу подобар квалитет на животот на наставниот кадар и веќе едно такво решение ќе поднесеме во Собранието“, рече Николоски.