Пред пратениците денеска започна дебата по Информација за висината, структурата, транспарентноста и намената на јавниот долг на Република Македонија, поднесена од пратениците на опозициските партии во Собранието на РМ.
Владата подолго време не даваше податоци за висината на јавниот долг и токму затоа опозицијата излезе со вакво барање, го образложи денеска предлогот Марјанчо Николов од СДСМ. Од 2009 Министерството за финансии не ги објавува јавно податоците за јавиот државен долг, туку само долгот на централната влада.
„Државниот долг не смее да надмине 30 проценти од бруто домашниот производ на РМ. А
долгот на централната влада изнесува 34 проценти, а треба да биде 30 проценти. Податоците од извештајот за 2012 година за управување со јавниот долг покажуваат дека изнесува 45 проценти од БДП на РМ или 3 387 000 000 евра. Владата ги пробила границите на јавен државен долг којшто самата си ги поставила. Таа се задолжува прекумерно“, потенцираше Николов.
„Владата не само што се повеќе ја задолжила РМ туку и го крие својот долг. Владата дел од своите кредити ги префрла на јавните претпријатија. Земате кредити и ги трошите само за кредити, споменици и барокни фасади. Со вакви кредити секоја влада можела да купи три-четири години власт“, рече од собраниската говорница Николов.
Тој истакна дека 220 милиони евра долгови Владата им има избришано на јавните претпријатија само за да се прикаже дека РМ е помалку задолжена земја. Во 2013 година креиран е нов долг од 313 милиони евра.
Информација за висината, структурата, транспарентноста и намената на јавниот долг на Република Македонија е поднесена од: Радмила Шекеринска Јанковска, Гордан Георгиев, Игор Ивановски, Тања Томиќ, Ана Павловска Данева, Оливер Спасовски, Горан Минчев, Благоја Стојановски, Самка Ибраимоски, Марјанчо Николов, Емилијан Станковиќ, Билјана Казанџиска, Миле Андонов, Голупчо Ангелов, Станка Анастасова, Панче Орцев, Горан Сугарески, Цветанка Иванова, Саве Марачков, Светлана Мазгалоска Вучетиќ, Борче Ставров, Јани Макрадули, Весна Бендевска, Митре Велјаноски, Ердоган Сарач, Дивна Јовковска Ефтимоска, Менде Диневски, Стојко Пауновски, Тито Петковски, Горан Мисовски, Соња Мираковска, Николче Ацевски, Ленче Николовска, Сафет Бишевац, Ивон Величковски, Рејхан Дурмиши, Мевмет Џемајлоски и Фијат Цаноски.