Нобеловата награда за економија годинава е доделена на тројца американски научници, Јуџин Фама, Ларс Петер Хансен и Роберт Шилер. Тие се наградени за нивната емпириска анализа на цените на капиталот.
Според образложението на академијата, иако е тешко да се предвиди дали цените на акциите ќе се зголемат или намалат на краток рок, можно е да се предвиди каков ќе биде трендот за период од три години или подолго.
„Овие откритија, кои можеби делуваат изненадувачки или контрадикторно, беа изведени и анализирани од годинешните лауреати“, оценува академијата.
Фама и Хансен соработуваат со Универзитетот во Чикаго, додека Шилер е професор на Универзитетот Јејл во Конектикат.
Американските научници доминираат веќе подолго време доминираат во освојувањето на Нобеловата награда за економија.
Со денешното соопштување на добитниците, Нобеловите комитети ги доделија сите награди предвидени за годинава.
Наградата за економија не е дел од оригиналните Нобелови награди за медицина, хемија, физика, литература и мир, кои беа креирани од шведскиот индустријалец Алфред Нобел во 1895 година. Таа беше додадена од страна на шведската Централна банка во 1968 година, во сеќавање на Нобел.