Историски и образовни прашања денеска тема на состанокот на заедничката мултидисциплинарна експертска комисија составена од македонски и бугарски историчари.
Пред нив ќе се најдат прашањето за ликот и делото на Гоце Делчев како и содржината во учебниците за седмо одделение.
Денешната 13. средба се одржува онлајн, Комисијата претходно се состана кон крајот на февруари, а тогаш Министерство за надворешни работи соопшти дека на средба не бил постигнат напредок во однос на дискусијата за учебниците по историја, ниту согласност за прашањата поврзани со Средниот век.
За бугарскиот копретседател на Комисијата Ангел Димитров 12. состанок заврши без напредок.
– Ние се уште сме во десеттиот век и нема чекор напред, изјави тогаш Димитров на брифинг во бугарското Министерство за надворешни работи. Тој тогаш изјави дека се уште не е решен спорот околу цар Самоил и случувањата од периодот на крајот на Првото бугарско царство, бидејќи од македонска страна постоела целосна воздржаност да се спомене дека заедничката историја започнала во Средниот век и поради „двоен стандард во проценката за Самоил, во зависност од тоа дали станува збор за заеднички прослави или за текстовите во македонските учебници“.
Македонските членови на Комисијата тогаш брифираа дека понудиле неколку предлози за Цар Самоил кои претставувале чекор напред од нивните досегашни позиции, но дека бугарските колеги ги одбиле и останале на своите стари ставови кои како што рекоа „се во основата на спорот меѓу двете историографии.“
Тие рекоа дека нивните колеги од Софија инсистираат да се наметне еднозначно решение кое е туѓо за начинот на кој се надминуваат спорови што произлегуваат од различните и силно исполитизирани толкувања на минатото.
Во 2021 година се очекува Комисијата да има пет состаноци.