Мајката на напаѓачот кој утринава пукаше во хирургот, починала во шок соба откако и откажало срцето по операцијата која и била извршена синоќа. Според информациите до кои дојде НОВА, првичната хистопатолошка анализа покажала дека пациентката имала рак предизвикан од камења во жолчното кесе. Лекарите велат дека таква состојба се создава со години и болеста веќе била во терминална фаза.
Пациентката била хоспитализирана пред четири дена на Клиниката за абодоменална хирургија, по што била вратена дома за да и се смират болките, за да може да биде оперирана.
Но, состојбата се влошила и синоќа околу 20 часот била повторно донесена на Клиниката. Кај неа бил откриен гнојник во жолчникот, рак предизвикан од камења во жолчката, но бил утврден и перикардит, односно воспаление на срцевиот мускул, застој во едниот бубрег, излив на белите дробови и уште неколку други заболувања.
Синоќа жената била оперирана од хирургот Љубомир Огненовиќ , кој го менувал својот колега на работното место. По операцијата жената била однесена во шок соба, но по неколку часа и откажало срцето и таа починала.
Во седум часот изутрина бил повикан нејзиниот син кој на клиниките дошол наоружан со пиштол. Влегол во кабинетот на хирургот Љубомир Огненовиќ кој го примил љубезно и се обидел да му објасни што се случило. По ова, напаѓачот започнал да пука, го погодил докторот три пати во ногата, а медицинската сестра успеала да се спаси. Во лекарската соба биле испукани 5-6 куршуми кои завршиле во sидовите и во мебелот.
На Клиниката за абдоменална хирургија откажани се сите операции кои биле планирани за утре. Лекарите се револтирани, тие за НОВА велат дека не знаат до кога ќе потрае ваквата ситуација.
*Тодоров чувствува одговорност, но не можел да спречи поединечни настани