Поднесувањето на барање за влез во ЕУ ќе се наплаќа електронски во износ од 7 евра, ќе важи за сите патници од 18 до 70 години а штом ќе се добие дозволата може да се користи за повеќекратни влезови во период од три години, предвидуваат новите правила за влез во Европската Унија што ќе почнат да се применуваат од мај наредната, 2023 година.
Европскиот систем за информации и овластување за патување (ETIAS), ќе бара од граѓаните кои патуваат во ЕУ да пополнат нов формулар врз основа на кој ќе им се издаде дозвола за влез во ЕУ но може и да не се дозволи патување во некоја од земјите членки на Унијата.
Овие правила веќе ќе можат да се применуваат од крајот на 2022 година, до кога од ЕУ очекуваат да биде финализирано формирањето на веб – страницата на која патниците од повеќе од 60 земји, вклучително и од Северна Македонија ќе можат да аплицираат и да добијат дозволи за влез во ЕУ уште од крајот на оваа година.
Документот – дозвола за патување на ЕТИАС, од Европската Унија не го карактеризираат дека е виза. Граѓаните од повеќе од 60 земји кои имаат визна либерализација за Шенген ќе продолжат да патуваат во ЕУ без виза, но ќе треба да добијат дозвола за патување преку системот ЕТИАС, кој ќе биде едноставен и брз и од кој се очекува 95 отсто од барањата за патување да добијат позитивен одговор и тоа во рок од само неколку минути, велат од надлежните служби на ЕУ.
Што се однесува до пополнувањето на формуларот, наводно тој бил така конципиран да немало да бидат потребни ни повеќе од 10 минути, а од потребните документи ќе се барале само информации содржани во пасошот а формуларот можело да се пополни лично или од страна на трето лице.
Планирано е пред почетокот на примената на правилата ЕТИАС за патување во ЕУ да има „транзициски период“ од шест месеци во кој патниците ќе бидат информирани за новите правила, а потоа и „грејс период“ .
Оние кои првпат ќе ја поминат границата на ЕУ ќе им биде дозволено тој прв пат и да не поседуваат дозвола за патување под новите услови.
Доколку патникот нема важечка ETIAS дозвола по грејс- периодот, нема да му биде дозволено да патува понатаму, а информациите за тоа ќе бидат запишани во Европскиот систем за влез и излез.
Во Брисел наведуваат дека целта на новиот систем и дозволи е да се добијат витални информации за тоа кој влегува во ЕУ, а со тоа и да се зголеми безбедноста во однос на нелегалното влегување, тероризмот и јавното здравје.
Европската комисија ваквите нови правила за патување ги предложи во 2016-та година и по две одлагања , предвидено е да станат целосно оперативни во мај наредната 2023 година.
Мирјана Трпческа