Четири опојни супстанции кои се појавија до април годинава претставуваат висок ризик за развојот на наркотичниот пазар во Европа, алармира Европскиот мониротинг центар за дроги и зависност од дрога (ЕМЦДДА).
Станува збор за синтетичките дроги МДПВ (метил-ендиокси-пировалерон), синтетичкиот опиоид AH-7921, синтетички катинони и метоксетамини, кои на пазарот се појавуваат замаскирано како контролирани дроги или како алтернатива на контролираните дроги.
Членките на Европската Унија минатата година за првпат пријавиле нови 81 психотропни супстанции, како рано предупредување за пораст на наркотиците кои се сомнителни дека предизвикуваат значителна штета на европско ниво.
Новата проблематична бројка на корисници на опојни дроги достигна околу 1 и пол милион луѓе, а предозираноста е сѐ уште главна причина за смртност кај младите Европејци.
Фентанил е понов пример, за исклучително високо ниво на смртни случаи предизвикани од предозирање во Естонија. Фентанилот припаѓа во групата на синтетички опојни дроги, кој на европскиот пазар се појави минатата година.
Старата дихотомија меѓу релативно малиот број на проблематични корисници на дрога, и мнозинството од експериментални и рекреативни корисници исчезнува и постепено се заменува со покомплексна ситуација, се вели во извештајот на ЕМЦДДА.
Хероинот, за разлика од порано денеска игра помала улога во европската проблематика, а стимулансите, синтетичките дроги, канабисот и лековите добиваат на значење.
Канабис во текот на животот употребувале речиси 74 милиони или 25 отсто Европејци, а од минатогодишната запленета незаконска дрога во ЕУ, во 80 проценти се работи за канабис.
Екстази земале околу 10 милиони корисници во земјите – членки на ЕУ.
Кокаин во текот на животот користеле 14 милиони луѓе.
Ова значи дека времето за дебатата околу новото законодавството на Европската Унија во оваа област и системот на Унијата за рано предупредување е под екстремен притисок, бидејќи различни наркотици зголемено се појавуваат на пазарот.