Клучни елементи за успешно справување со ХИВ-инфекцијата како јавно-здравствен проблем се: елиминирање на предрасудите, промовирање на доброволното и доверливо советување и тестирање, превентивните активности помеѓу ранливите групи граѓани, грижата и поддршката за луѓето што живеат со ХИВ, навременото отпочнување со терапија и обезбедувањето на континуирана достапност на современа и квалитетна антиретровирусна терапија, која истовремено е и превенција, порачуваат од Платформата за ХИВ која ја сочинуваат 16 граѓански организации што во партнерство со Министерството за здравство ги спроведуваат програмите за превенција на ХИВ.
Овие програми во Македонија се поддржани со грантовите од Глобалниот фонд за борба против СИДА, туберкулоза и маларија од 2004 година и ќе траат до крајот на 2016 година. По ова, во наредните две години државата треба да изготви стратегија за да преземе во целост одржувањето на овие клучни јавно-здравствени програми.
„Преку активностите на здруженијата се откриени вкупно 7 нови случаи на ХИВ-инфекција. Со моделот на доброволно и доверливо советување и тестирање сите овие случаи се откриени во ран стадиум, кога може да се очекува брз и одличен ефект од лекувањето со антиретровирусна терапија. Само преку теренското советување и тестирање, до крајот на октомври се направени 1200 тестирања. На овој начин на годишно ниво се прават по 1500 до 2000 тестирања“велат од Платформата на граѓанските организации.
Со програмите за размена на стерилен прибор за инкјектирање во 13 града низ Македонија, преку 15 програми (3 во Скопје) се опфатени 3500 корисници на дроги коишто инјектираат, а со програмите за лекување на зависности со супституциска терапија се опфатени 1500 лица, додека за рехабилитација и ресоцијализација на лица зависни од дроги постои една тераписка заедница во Струмица.
„На овој ден сите ние заеднички ги реафирмираме нашите заложби за справување со ХИВ-инфекцијата. Затоа, сакаме да упатиме порака за конечно тргнување на стигмата врзана за ХИВ, особено стигмата кон луѓето што живеат со вирусот или оние што се под поголем ризик од изложеност на него. Сите ние, а особено професионалците во здравствениот сектор, ХИВ-инфекцијата мора да ја третираме како и секоја друга здравствена состојба, уште повеќе – како хронична состојба која што успешно се третира со помош на антиретровирусната терапија и со сеопфатна грижа и поддршка; како дел од нашето секојдневие, и како вирус кој не прави разлика помеѓу луѓето како што честопати правиме сите ние, порачаа од Платформата на 16-те граѓанските организации.