Американскиот претседател Барак Обама потпиша Закон за милијарда долари кредит за Украина, со кој се предвидени и директни санкции за одделни личности во Русија поради припојувањето на Крим.
Некои конгресмени побараа Обама да преземе и други мерки, вклучувајќи поголем извоз на гас во Европа.
Американскиот претседател после потпишувањето на Законот се сретна со лидерите на Конгресот за да им се заблагодари, но истовремено апелираше тие да одат чекор понатаму и да ги усвојат измените во Меѓународниот монетарен фонд.
Тој во овалната соба разговараше со претседателот на Претставничкиот дом Џон Бејнер, лидерот на пратеничкото малцинство во Претставничкиот дом Ненси Пелоси, лидерот на мнозинството во Сенатот Хери Рид и лидерот на малцинството во Сенатот Мич Мекконел. Тие ја напуштија Белата куќа без да се обратат до новинарите.
Белата куќа соопшти дека Обама ги информирал лидерите на Конгресот за својата неодамнешна посета на Европа и Саудиска Арабија и им порача дека САД и натаму ќе се залагаат за пружање помош на Украина и изолирање на Русија поради повреда на украинскиот суверенитет.