Американскиот претседател Барак Обама на годишната вечера во Белата куќа со Асоцијацијата на дописници ја презел улогата на комичар. Во неговиот 20-минутен говор тој се шегувал на сметка на домашните проблеми, политичките противници, медиумското известување, но и на сметка на рускиот претседател Владимир Путин.
На свечената вечера во саботата присуствувале некои од најпознатите личности од политиката, забавата и спортит. Во круговите на Вашингтон позната е како „nerd prom“.
„Не успеавме да се договориме за осигурувањето за невработените. Републиканците одбиваа да го продолжат. Почнувам да мислам дека се во право. Ако сакате да бидете платени, а да не работите, треба да се кандидирате за Конгресот, токму како и сите други“, рекол Обама.
На медиумската куќа „Фокс“ ѝ порачал дека знае дека ќе им недостига кога веќе нема да биде претседател. „Ќе биде потешко да се убеди американскиот народ дека Хилари (Клинтон) е родена во Кенија.“
Обама ја искоментирал и приказната на една конзервативна телевизија за голите гради на Путин и коментарот во еден од медиумите минатата година дека Путин би можел да ја добие Нобеловата награда за мир.
„Да бидеме искрени, овие денови ја даваат речиси секому“, рекол Обама, кој и самиот ја доби таа награда во 2009 година.
Според официјалниот веб-сајт на Асоцијацијата, настанот е наменет за прибирање средства за стипендии за новинари и за награди во новинарската професија.