Светот ја губи битката против вирусот ебола и не успева да го сопре ширењето на смртоносната епидемија, предупреди претставник на ОН на седницата на Советот за безбедност, пренесува Би-би-си.
„Еболата има голема предност во однос на нас“, рече Ентон Банбери, шеф на мисијата на ОН задолжена за координирање на брз одговор на епидемијата на ебола.
Според него глобалниот одговор на еболата мора да ги исполни зацртаните цели до 1 декември за да се обезбедат околу 7.000 кревети за лекување и 500 специјално опремени тимови за погребување, или светот ќе се соочи со „ситуација без преседан, за чие решавање немаме план“.
Банбери вели сега на располагање имаат само 4.300 кревети за возрасни, а нема доволно медицински персонал да се грижи за нив.
Според последната проценка на Светската здравствена организација, се очекува во западна Африка од декември неделно да се регистрираат меѓу 5.000 и 10.000 нови случаи на заразени со ебола.
„Треба да ја победиме еболата и тоа брзо. Секој изминат ден значи поголем број на заболени“, рече тој.
Според СЗО новиот биланс на светско ниво е 4.447 починати и 8.914 заболени, речиси сите во западна Африка.