Од Струшки вечери на поезијата ги објавија петте стихозбирки кои влегле во потесен круг за наградата „Браќа Миладиновци“. Стихозбирките кои влегле во потесен круг се: „Со слободна рака“ од Јовица Ивановски; „Напишана тишина“ од Јосип Коцев; „Внатрешни планини“ од Владимир Мартиновски; „Јас. Елегии“ од Михаил Ренџов и „Жива вода“ од Наташа Сарџоска.
Струшки вечери на поезијата, оваа година за половина го зголеми фондот на најпрестижната награда за творештво на македонски јазик, а дел од наградата е и превод на книгата на добитникот на еден странски јазик.
Составот на жирито останува таен до донесувањето на конечната одлука.
Добитникот ќе биде соопштен на 25 август, за време на 56-тото издание на фестивалот во Струга.
На Конкурсот на фестивалот Струшки вечери на поезијата за најдобра поетска книга на македонски јазик објавена помеѓу две фестивалски изданија пристигнале 38 книги од 37 автори.
Поетската манифестација Струшки вечери на поезијата се одржува повеќе од половина век, секоја година кон крајот на август. На поетскиот фестивал се доделува и наградата „Златен венец“ која досега ја имаат добиено некои од најзначајните светски поети.