Володимир Рибак, претседателот на украинскиот парламент и близок соработник на претседателот Виктор Јанукович, сабајлево поднесе оставка на оваа функција. Истовремено, во последните часови, повеќе пратеницу на Партијата на регионите која е на власт, се одлучија за истиот чекор.
Александре Турчинов, десната рака на Јулија Тимошенко, беше избран денес за нов претседател на украинскиот парламент.
Тој беше изгласан со 288 гласа «за» од вкупно 450. «Власта во Украина ја превзема работата за да ја стабилизира ситуацијата», рече тој.
Во парламентот Кличко изјави дека сака избори пред 25 мај и бара од парламентот да ја одреди датата. Освен тоа се очекува да се усвои резолуција со која ќе се бара од Јанукович да поднесе оставка.
Ситуацијата во Киев и понатаму е напната откако вчера беше потпишан договор помеѓу претседателот Јанукович и опозицијата за излез од кризата. Но јасно е дека овој договор е кревок. Во петокот вечерта лидерот на паравоената екстремна десница “Прав сектор”, активен во урбаната герила, ги повика протестантите да ја нападнат претседателската палата доколку Јанукович одбива да поднесе оставка. Овој повик беше пречекан со аплаузи, јавуваат агенциите од Киев.
За многумина договорот е не доволен чекор и сметаат дека Јанукович треба да поднесе оставка исто така.
Некои од лидерите на опозицијата беа критикувани затоа што потпишале договор со власта. Витали Кличко, еден од опозиционите лидери, рече дека не му претставувало никакво задоволство потишувањето на договорот. “Ако ве повредив, простете ми”, им рече Кличко на протестаните кои беа собрани во петокот вечерта да им оддадат почит на загинатите сограѓани.
Договорот беше потпишан во петокот под силен притисок на европската дипломатија. Тој предвидува предвремени избори, најдоцна во декември, коалициската влада во наредните десет дена и враќање на уставот од 2004 година кој му дава помалку власт на претседателот на државата. Нешто подоцна беше усвоен и закон со кој се отвора патот за ослободување на Јулија Тимошенко од затвор. Таа беше осудена на 7 години затвор во 2011 година за злоупотреба на власта.
Договорот е потпишан откако судирите во Киев однесоа 80 жртви.
Агенцијата АФП јавува дека според еден висок американски дипломат Јанукович заминал во својот регион на истокот на земјата за да учествува на политички состанок. Но, некои од украинските пратеници тврдат дека од кредибилни извори дознале дека Јанукович е во Сочи каде што треба да се сретне со Владимир Путин.
Се слушаат тези дека Јанукович избегал од Украина. Новинарите на телевизијата Канал 5 објавија дека успеале да влезат без проблеми во резиденцијата на претседателот која вообичаено е добро заштитена и се наоѓа во предградие на Киев. Некои од манифестантите влегле исто без проблем во зградата на претседателствто во центарот на Киев.
Путин и американскиот претседател Барак Обама повикаа на брза примена на договорот затоа што ситуацијата во земјата е исклучително кревка. Европските дипломати, министрите на Франција, Германија и Полска, кои учествуваа во преговорите помешу власта и опозицијата, велат дека тие преговори биле напнати. Полскиот министер Радослав Сикорски на опозиционите лидери им рекол дека мораат да потпишат. Во спротивно, ги чека воен удар и многу повеќе жртви.