Јавен обвинител за гонење организиран криминал ја прошири постапката против десет лица осомничени за трговија со деца, полова злоупотреба на немоќно лице и производство и дистрибуција на детска порнографија.
„Во јануари годинава, обвинителот донесе наредба против пет лица кои сексуално злоупотребувале малолетничка и изготвувале порнографски материјал. По преземените дејствија во текот на истражната постапка, јавниот обвинител прибави цврсти докази врз основа на кои во соработка со Националната единица за сузбивање криумчарење мигранти и трговија со луѓе при МВР денес спроведе акција. Извршени се претреси на повеќе локации во Велес и на по една локација во Скопје и Тетово, притоа лишени се од слобода девет лица, додека еден осомничен се наоѓа надвор од државата“, соопшти денес обвинителството.
Поради опасност од бегство, дека ќе ги сокријат, фалсификуваат или уништат трагите на кривичното дело и дека со влијание врз сведоци и соучесници ќе ја попречат истрагата, како и стравот ако се бранат од слобода дека ќе го повторат делото, јавниот обвинител побара притвор за осуммина осомничени и мерки на претпазливост за две лица осомничени за производство и дистрибуција на детска порнографија.
За кривичните дела трговија со деца и полова злоупотреба на немоќно лице се предвидени затворски казни од најмалку 8 години, додека за кривично дело производство и дистрибуција на детска порнографија затворска казна од 3 до 5 години.