Јавното обвинителство во предистражна постапка испитува кривична одговорност кај поранешниот претседател на Врховниот суд, Јово Вангеловски, за чување судски предмети во фиока стари со години, за што првично информираше Нова ТВ.
Според информациите на СДК, кај него се затекнати 57 одамна завршени, како и непотпишани предмети поради кои странките претрпеле штета во однос на разумен рок на судењата, како и за неостварување на нивните права со чувањето на нивните предмети во фиока.
Се испитуваат и причините зошто на пример четворица врховни судии од петчлениот кривичен совет ставиле потписи на заглавените предмети, а еден не и кои се тие врховни судии што блокирале. Јавното обвинителство бара евентуална одговорност и кај административната служба за непостапување по фатените предмети во канцеларијата на Вангеловски. Меѓу тие предмети има и такви од 2015, 2016 и 2017 година. Има и од 2018 и 2019. Оштетените странки ќе имаат право на отштета.
Деновиве претседателот на Судскиот совет, Киро Здравев, потврди дека судски предмети се чувале во фиоките на Вангеловски и дека за тоа го известил Основното јавно Обвинителство. Во врска со предметите, тој рече дека на странките им се повредени правата на итно постапување, односно постапување во согласност со принципот за судење во разумен рок.
Вршителот на должност претседател на Врховниот суд, Фаик Арслани, зборуваше за бројка од триесетина стари предмети кои биле затечени во кабинетот во моментот на примо-предавање на функцијата. Дел од предмети биле со донесени одлуки, делумно потпишани од судиите, а делумно не.
„Таквата состојба ја изнесов на Кривичен одел, а потоа и на Кривичен совет и секој предмет одделно го разгледавме и донесовме соодветни одлуки што да се направи, бидејќи таквите предмети не можеа да се верифицираат поради тоа што беше поминато подолго време“, појасни Арслани.