Семејството на Далибор Илиевски, триесет и едногодишниот Ром од Свети Николе кој синоќа беше застрелан од полицаец, се подготвуваат да тргнат од Кочани за да се соберат во знак на протест за смртта на нивниот роднина. Ова за НОВА го потврдија негови блиски роднини, кои се револтирани бидејќи е убиен од зад грб од полицаец, за кој велат дека можел само да го уапси, а не и да извади пиштол да пука во него.
Далибор е сопруг и татко на три деца. Работел како сезонски работник во градежништво и сезнски работи поврзани со земјоделие. За него велат дека бил проблематичен за ситни кражби на дрва, на бали, понекогаш предзвикувал и тепачки, расправии. Во моментот на несреќата се претпоставува дека бил во алкохолизирана состојба.
Очевидец на настанот кој случајно се нашол таму, а сакаше да остане анонимен за НОВА раскажува дека Далибор бил нервозен и почнал расправија со велосипедистот кој му се испречил во тесната улица. Во истиот момент тука се нашол и полицаецот кој дошол да го легитимира.
Очевидецот вели дека не е точно дека сакал да го прегази полицаецот, туку во моментот кога му се приближил полицаецот, тој тргнал со Ладата, а возилото му избегало од контрола, на страна бидејќи бил пијан. Според верзијата на момчето очевидец, полицаецот тргнал кон него за да го извлече од од возилото.
„Полицаецот го држеше и се обиде да го извлече од возилото, вратата беше отворена. Ладата тргна, а полицаецот се влечеше со отворена врата. Во еден момент падна, стана, го извади пиштолот и му пукаше во грб, во плешката“, вели очевидец за НОВА.
Далибор ранет, наведнат над воланот продолжил да вози до амбуланатата која била одалечена на 150 метра од местото на настанот. Успеал да стигне до паркингот на амбулантата и починал. Веднаш притрчала медицинска екипа, но не можеле да сторат ништо.
Неофицијално, куршумот останал во градите и веројатно стигнал до срцето. Наводно, на полицаецот му е одредена мерка притвор во траење од 30 дена, но за ова нема официјална потврда од СВР Штип.
Поради дискриминацијата на Ромите, кои во Свети Николе се Христијани по вероисповед, некои од граѓаните стравуваат од ескалација на случајот.
Основното јавно обвинителство Штип соопшти дека дежурен јавен обвинител ги преземал потребните дејствија за да ги расветли причините за употребата на огнено оружје од страна на полицаецот од Полициската станица Свети Николе, кој синоќа при вршење на службени дејствија со пиштол усмрти едно лице.
Како што соопштува Обвинителството, според првичните сознанија полицаецот забележал возило „Лада“ кое се движело со голема брзина и велосипед кој се движел пред него. Возачот на Лада, видно лут од велосипедистот поради тоа што тој се движел пред него и му пречел во движењето, го запрел возилото и започнал вербална и физичка расправија.
Токму заради тоа, полицаецот пристапил, ги одвоил и започнал со легитимирање на возачот на патничкото возило, кој пак давал отпор и започнал со тегнење и буткање да се спротиставува на службеното лице.
Според соопштението од Обвинителството, возачот седнал во возилото и започнал да го движи по патот држејќи го полицаецот за рака, влечејќи го десетина метри по патот, при што од брзината на движење полицаецот паднал на патот.
Возачот на Ладата, 30-годишен жител на Свети Николе, потоа во два наврата, вртејќи полукруг се враќал кон полицаецот обидувајќи се да го прегази.
Во неговиот втор обид бил спречен од страна на полицаецот, кој во полуседечка положба употребил огнено оружје и притоа му нанел огнострелна рана, од која лицето починало.
Надлежен обвинител продолжува со истражните дејствија со цел да се утврдат фактите и доказите во предметот.