Вакцинација против сезонски грип почнува в петок, изјави за НоваТВ д-р Бесим Зекири, директор на Центарот за јавно здравје – Скопје.
Тој вели дека вакцините се од француски производител и се четиривалентни.
– Досега е обезбедена набавка на 40.000 дози од бесплатните вакцини за лица со хронични заболувања и други ризични категории. Во Скопје ќе има и 4.000 дози вакцини кои ќе се наплатуваат – вели д-р Зекири и додава дека цената на вакцините за оние кои сакаат да се вакцинираат, а не спаѓаат во категории граѓани на кои бесплатно им следува вакцина, во минатата година изнесувала 800 денари. Колку ќе чини вакцината против грип годинава, сеуште не е прецизирано.
Освен во скопскиот Центар за јавно здравје, имунизација против грип ќе се врши и во поликлиниките при Здравствениот дом Скопје и во центрите и во здравствените домови во целата земја.
Досега над 20.000 граѓани се пријавиле за заштита против сезонски грип. Овие граѓани деновиве треба да добијат порака каде и кога треба да се јават за вакцинација.
Д-р Љуљзиме Бајрами, раководителка на одделот за епидемиологија во скопскиот Центар за јавно здравје, вели дека скопјани едвај чекаат вакцините да стасаат и да почнат да се вакцинираат.
– Граѓаните нон-стоп доаѓаат во центарот и прашуваат кога ќе почне вакцинација против грип. Дел од нив дури мислат и дека ги лажеме, дека вакцините стасале, а не почнуваме да ги даваме…Секој којшто е пријавен преку системот „Мој термин“ се очекува да добие вакцина против грип – вели д-р Бајрами.
Директорот Зекири не ја исклучува можноста да бидат набавени уште вакцини против грип, доколку има заинтересираност од граѓаните.
За тоа дали може истовремено да се примат и вакцина против ковид-19 и вакцина против грип, тој вели:
– Очекуваме насоки од Комитетот за вакцинација, препораката досега беше да се даваат во размак од две недели вакцините против ковид-19 и против грип. Но до петок очекуваме да ги добиеме најновите препораки, додава д-р Зекири.
(Љ.Б.)