Градската општа болницата „8 Септември“ да не биде повеќе Ковид центар и да почне нормално да функционира за другите пациенти, побарале од Синдикатот на болницата на средбата со министерот за здравство Венко Филипче.
На состанокот на кој бил присутен и претседателот на Синдикатот за здравство и фармација, било побарано болницата да се врати во првобитната состојба, а за пациенти со Ковид да бидат на располагање само 50 кревети. Информацијата за НОВА, ја потврдија од Синдикатот на ГОБ“8 Септември“.
„Баравме да се врати во првобитна состојба болницата, а за пациентите со Ковид да има на располагање 50 кревети на приземјето и на првиот спрат каде што е интензивното одделение. Министерот Филипче рече дека нашите барања се реални и дека е благодарен за што сме направиле досега, за целата жртва. Беше ветено дека намалувањето на капацитетите ќе се одвива постепено, до септември“, велат за НОВА од Синдикатот на болницата.
Од Синдикатот велат, Филипче им ветил дека затворањето на одделенијата ќе започне од наредната недела кога ќе биде затворено едно од одделенијата.
Планот е да се затвораат едно по едно одделите на кои што се сместени пациенти со Ковид, за од есен болницата да се стави во функција на граѓаните. Тие велат велат дека се задоволни од приемот и од разговорот со министерот Филипче и дека останува да се види, дали ветеното ќе почне да се реализира.
Според информациите, за пациентите ќе биде на располагање уште една мобилна болница, како и студентските домови во Битола и Охрид.
Болницата од 16 март функционира како Ковид центар и таму се примаат најтешко болните пациенти. Хирурзите постојано реагираат и бараат да се врати редовната програма и да започнат да оперираат пациенти чии операции беа одложувани.
И анестезиолозите и останатиот медицински персонал реагираат и се жалат дека се преморени и повеќе не може да се функционира во вакви услови. Во болницата секоја ноќ се примаат од 15 до 20 нови случаи со Ковид.
Како што веќе објави НОВА, лекарите уште пред две недели побараа да се стопира приемот на нови пациенти со Ковид во ГОБ„Септември“ затоа што веќе нема место место, оделенијата на петте спрата се преполни, а вработените се преморени и исцрпени.
„Ситуацијата е критична. Треба да се стопира приемот на нови пациенти со Ковид-19. Сите сме на крај на сили, особено тие што сме во трите оддели каде што се најтешко болните, во шок соба, интензивна, во Ковид центарот, велат анестезиолозите за НОВА.
Тие тврдат дека во овие оддели сликата е очајна, медицински сестри паѓаат од умор, колабираат, повраќаат од премореност од работа. Анстезиолозите се изморени во битката со пандемијата без прекин четири месеци.
Поради сето ова ситуацијата станува неиздржлива и здравствените работници од „8 Септември“, апелираа до надлежните за побрзо решавање на проблемот, за да не дојде до непосакуваното, до колапс на болницата.