Одгледување, купување, продажба на марихуаната – Уругвај стана првата земја која целосно ја легализираше, односно Горниот дом на парламентот на оваа земја со 16 гласа „за“ и 13 „против“ го изгласа законот, предложен од претседателот Хосе Мухика.
Со регулирање на продажбата на марихуана, Владата се обидува да го загрози црниот бизнис и да го спречи финансирањето на криминалните картели.
Во Уругвај ќе бидат отворени лиценцирани аптеки, во кои секој полнолетен граѓанин ќе може да купи најмногу 40 грама марихуана месечно. Дополнително, се дозволува одгледување на најмногу 6 растенија во домашни услови. Сите купувачи и одгледувачи ќе бидат регистрирани во посебна база на податоци, преку која Владата ќе ги следи нивните купопродажби.
Според анкетите во земјата, мислењата околу одлуката се поделени – над 50% од граѓаните и натаму се противат на законот, пренесуваат светските медиуми.
Легализацијата, најслободна во која било земја во светот досега, се смета за пионерски експеримент кој внимателно ќе биде следен од страна на другите земји во кои се дебатира за легализација на лесните дроги. Законот ќе стапи на сила за 120 дена, а со него е предвидена и можност за формирање посебни клубови за пушење, со 15 до 45 членови, кои ќе можат да пораснат до 99 стебла марихуана годишно.
Освен Холандија, каде е дозволено купување и одгледување, и американските држави Колорадо и Вашингтон изгласаа закони со кои се дозволува рекреативно користење на марихуаната.