Границите не се затворени во вистинска смисла на зборот и Франција ќе го организира Самитот на ОН за климатски промени во Париз кој е предвиден за 30.ноември.
Ова денеска го потврди француската амбасадорка во Македонија, Лоренс Оер по терористичките напади во Париз. Таа рече дека откако земјата беше сведок на нападите во јануари врз редакцијата на сатиричниот магазин „Шарли Ебдо“, не ни помислувала дека ќе и се случи ова.
– Франција е во голем шок бидејќи се соочи со атентат кој понесе голем број жртви а не ни замислувавме дека по 11.јануари ќе се соочиме со такви ужасни сцени. Бројот на жртви изнесува 128 луѓе а 252 лица се сериозно повредени од кои 80 се борат за живот, изјави Оер.
Според она што е досега познато, напади имало на седум различни места, а Оер особено го истакна нападот на францускиот стадион каде што се играше пријателскиот фудбалски натпревар помеѓу Франција и Германија на кој присуствуваше и претседателот Франсоа Оланд.
Оер нагласи дека во оваа рана фаза по немилите настани, нема никаква поврзаност помеѓу мигрантската криза или француските џихадисти кои се борат во Сирија со нападите.
– Истрагата покажува дека еден од камиказите е француски државјанин кој скоро се исламизирал а ова го потенцирам бидејќи сакам да кажам дека заканата не е од надвор, рече француската амбасадорка додавајќи дека сепак не треба да се занемари фактот што одговорноста ја презедоа терористите на ИСИС.
Таа им се заблагодари на сите пријатели и сите граѓани во Македонија како и на раководните лица во земјава.
– Ние во Париз навистина го цениме тоа. Трогнати сме од големата солидарност која ја добиваме и денес, рече амбасадорката.