Јавното обвинителство ги следи сите информации поврзани со случајот што го отвори Државната комисија за спречување на корупција а се однесува на предвременото полагање на правосуден испит на Барлет Џафери, син на собранискиот спикер Талат Џафери.
Од НоваТВ побаравме одговор од Основното јавно обвинителство, дали ќе отвори истрага околу случајот „правосуден испит“.
„Го следиме случајот и доколку се утврди дека постојат елементи на кривично дело во наведениот настан, ќе постапиме согласно своите законски надлежности.“, ни одговорија од ОЈО.
Инаку, претседателката на Државната комисија за спречување на корупцијата (ДКСК) Билјана Ивановска деновиве во медиумите истакна дека предвременото полагање правосуден испит било масовна појава во тоа време, кога и синот на Талат Џафери, Барлет Џафери положил правосуден испит пред да дипломира.
Ивановска во емисијата „Топ Тема“ на телевизија Телма, рече дека погрешно се толкува во јавноста дека Антикорупциска не отвора предмет за случајот со Барлет Џафери. Таа вели „не дека не сакаме, туку до тука можеме да истражуваме“.
Инаку, во врска со случајот на ДКСК со Барлет Џафери, од Министерството за правда информираа, дека согласно евиденционата тетратка за положени кандидати што се води во Министерството за правда и е од трајна вредност, лицето Барлет Џафери има положено правосуден испит на 05.02.2015 година. „Потписот за положен правосуден испит го ставил министерот за правда кој ја извршувал функцијата во 2015 година“, информираа од таму.
Министер за правда во посочениот мандат беше Аднан Јашари.
А.В