Атмосферата во „Арена Загреб“ полека се загрева за најважниот дуел вечерва во 19 часот и 30 минути во рамките на Ц-групата меѓу Македонија и Словенија. Двете репрезентации ќе имаат голема поддршка од трибините.
Македонските ракометари ќе бидат бодрени од околу 2.000 навивачи, кои веќе во еден клуб во близина на салата ја подгреваат атмосферата, додека Словенија ќе има помош од околу 5.000 навивачи.
Фановите на двете репрезентации во подтрибинскитот простор се забавуваат со разните активности што ги има организирано домаќинот заедно со неговите спонзори.
Во исто време додека се игра дуелот меѓу Германија и Црна Гора само неколку илјади гледачи се наоѓаат на трибините.
Во меѓувреме на влезовите има голем број навивачи кои доаѓаат и се очекува капацитетот на „Арена Загреб“ да биде исполнет за дербито на вечерта.
Ова за македонските ракометари е петто учество на континенталните првенства. Првото учество беше во 1998 година во Италија, кога беше освоено 12-то место. На следниот шампионат на кој настапи Македонија го постигна најдобриот резултат и го освои 5.место во Србија 2012 година. На шампионатот 2014 година во Данска, нашите ракометари го освоија 10.место, а пред две години во Полска се пласираа на 11.место.