Околу 500 литри млеко Пекабела со 3,2 проценти масленост, цела недела стои запечатено во магацин на една скопска фирма бидејќи има забрана да се употребува како неисправно. Млекото било наменето за подготовка на храна во кујните за децата во повеќе училишта во Скопје. Документот од анализите од Центарот за јавно здравје до кој дојде НОВА, покажува дека испитаниот примерок од млекото не одговара на прописите за квалитет заради намален процент на безмасна сува материја.
Млекото кое требало да го пијат децата во училиштата е произведено во млекара во НИШ. НОВА веднаш побара објаснување од Агенцијата за храна, како е возможно граничната контрола да дозволи млеко што не е исправно за употреба, да влезе во земјата. Од тој момент телефонот на портпаролката на Агенцијата за храна стана недостапен за НОВА.
Одговор не добивме ниту од производителот Пекабеско. Директорот за одделот за млеко и млечни производи рече дека не може да одговори на прашањето, но вети дека објаснување ќе добиеме од генералниот директор откако ќе му го даде контакт телефонот.
НОВА го пронајде и сопственикот на фирмата во чиј магацин стои запечатено млекото.
„Да точно е, млекото стои запечатено во магацинот на нашата фирма. Анализите ги направив на своја инцијатива бидејќи производителот не ми доставил резултати од испитувања кои се задолжителни, изјави за НОВА сопственикот на фирмата кој сакаше да остане анонимен.
Сепак, НОВА од свои извори во Агенција за храна дознава дека деновиве таму го барале кртот кој ја дал информацијата на НОВА, наместо веднаш да преземат мерки и да го уништат млекото. Неофицијално, утринава инспектори од Агенцијата биле во магацинот и на сопственикот и му наложиле млекото да го врати на производителот. Наводно, се подготвува и кривична пријава за инспекторот од граничната контрола кој дозволил, неисправно млеко да влезе во државата.
Нема одговор колку вакво млеко има влезено во државата и дали го има на рафтовите во маркетите. Агенцијата за храна не се изјасни дали прави контроли во маркетите низ државата.