Петро Порошенко, според прогнозите, освои апсолутно мнозинство на претседателските избори во Украина и најави дека ќе отпатува во кризниот регион. Главниот противкандидат Тимошенко го призна поразот, јавува Дојче веле.
Олигархот Петро Порошенко, кој според прогнозите е избран за иден претседател на Украина има намера да му стави крај на вооружениот конфликт во земјата колку што е можно побрзо. Негов приорите било „да ја заврши војната и да донесе мир“, рече верчерва Порошенко. Тој најави дека како прво ќе отпатува во Донбасот на истокот на Украина, каде вооружените проруски сепаратисти со недели се борат против преодната влада во Киев.
Порошенко нагласи дека Украинците избрале проевропски курс и истакна дека ќе се залага за брз дијалог со Русија. Тој се произнесе и за предвремени парламентарни избори. Порошенко беше единствениот олигарх во земјата, кој застана зад проевропското Мајдан-движење и беше негов важен донатор.
Во меѓувреме, главниот против-кандидат на Порошенко, поранешниот премиер на Украина Јулија Тимошенко го призна поразот. „Би сакала пред сѐ да им се заблагодарам на Украинците за тоа, што изборите се одржаа и покрај руската агресија“, рече Тимошеко денеска во Киев. Таа притоа беше видно разочарана од нејзиниот резултат. „Сега не мораме повеќе да избираме меѓу ЕУ и (руската) царинска унија“, дополни таа. Одлуката била јасна, за европскиот курс на земјата.
Според прогнозите Порошенко освои апсолутно мнозинство, поради што нема да има втор круг избори во Украина. На второ место се пласирше Тимошенко. На претседателските избори во Украина се кандидираа повеќе од 20 кандидати, јави Дојче веле.