Министерот за внатрешни работи, Митко Чавков поднесе оставка, а Оливер Андонов е предлог на Владата за нов министер за внатрешни работи, објави МИА.
Портпаролот на Владата, Александар Ѓорѓиев за МИА потврди дека се очекува премиерот Емил Димитриев да го предложи Митко Чавков за нов директор на Бирото за јавна безбедност во МВР.
Тој потврди дека претпладнето Владата имала седница на која по нивно лично барање се разрешени досегашните директори на Бирото за јавна безбедност и Управата за безбедност и контраразузнавање, Горанче Савовски и Љупчо Андоновски.
На истата седница за нов директор на УБК е именуван Владимир Атанасовски, досегашен директор на Управата за финансиско разузнавање.
Се очекува Собранитео во текот на денот да одржи седница на која ќе биде констатирана оставката на Митко Чавков и на која ќе се гласа за предлогот за избор на Оливер Андонов за нов министер за внатрешни работи.
Оливер Андонов е член на ГДОМ, и до неодамна професор на МИТ, кој после извесно време доби отказ од овој Универзитет, заради непочитување на работните односи.
Андонов ќе биде министер за внатрешни работи само еден ден, до назначувањето на Оливер Спасовски од СДСМ, кој на ова место се враќа како дел од преодната Влада, која започнува да функционира во сабота.