Цела генерација на сириските деца ризикува да биде изгубена поради незапирањето на граѓанската војна во земјата, предупреди Фондот за деца на Обединетите нации, УНИЦЕФ, велејќи дека Сирија е во итна потреба од средства за решавање на кризата.
– Како кризата во Сирија влегува во својата трета, трагична година без било какви сигнали за крај, ризикот дека може да се изгуби една цела генерација расте секој час, секој ден и секој месец, изјави портпаролот на УНИЦЕФ, Патрик МекКормик.
Од седиште на агенцијата во Женева посочуваат дека речиси половина од четири милиони кои се во очајна потреба од помош во Сирија, се на возраст под 18 години, а 536.000 од нив се деца на возраст под пет години.
Извршниот директор на УНИЦЕФ Ентони Лејк изјави дека децата секој ден се сведоци на уништување. Во извештајот на УНИЦЕФ објавен вчера се наведува дека децата имаат трауми затоа што гледале како им се убиваат родителите и пријателите во конфликтот.
Во извештајот исто така се наведува дека во областите погодени од конфликтот се зголемил бројот на деца кои страдаат од болести на кожата и респираторни болести. УНИЦЕФ соопштува и дека секое петто училиште е уништено или пак се користи како засолниште на раселените семејства.
– УНИЦЕФ е посветена на чување на децата од Сирија и спречување да станат изгубена генерација. Никој од нас не може да си дозволи тоа да се случи, рече МекКормик.
УНИЦЕФ има потреба од итно финансирање за да продолжи со својата работа. Финансирањето за Сирија е исклучително разочарувачки во споредба со други вонредни околности”, додаде тој.