Вечерва заседаваа Извршниот и Централниот одбор на СДСМ, кое е највисоко тело меѓу двата конгреса на партијата и како што информираат од Бихаќка, на седницата се дебатирало за актуелната политичка ситуација а резултат од сето тоа е одложена оставката на Зоран Заев , чин пропратен со аплаузи и овации од членовите на овие две тела.
ЦО на СДСМ побарал лидерот на СДСМ и премиер , Зоран Заев да го одложи поднесувањето на оставката се до стабилизирање на земјата. Да се чека собраниската седница за гласање доверба на владата, на иницијатива на неколку партии предводени од ВМРО-ДПМНЕ, и потоа да се одлучи што понатаму и какви чекори да се преземат.
-Имаше плодна дискусија на членовите на Извршниот одбор и Централниот одбор и со оглед на моментумот во кој се наоѓа државата, беше препорачано и едногласно беше донесена одлука претседателот и премиерот да ја одложи оставката на неодредено време. После долги години режим државата се гради на демократски и слободарски вредности и овој моментум не смее да се пропушти, кажа функционерот на партијата, Перо Костадинов.
Според Костадинов СДСМ наредниот период ќе работи исклучиво на интересите на граѓаните, особено поради можноста повторно земјата да биде во криза и во ретроградни процеси.
Одложени се и оставките на целото раководство на партијата а СДСМ го овластил Заев да преговара за зголемување на парламентарното мнозинство.