Германската сојузна министерка за образование Анете Шаван поднесе оставка поради обвинувањата за плагијат на нејзината докторска дисертација.
Оставката ја потврди канцеларката Ангела Меркел на прес-конференција истовремено соопштувајќи го името на наследничката на Шаван – тоа е министерката за наука од покраината Долна Сакоснија, Јохана Ванка.
Универзитетот во Диселдорф во вторникот и‘ ја одзеде докторската титула на Шаван поради „намерно препишување“ во нејзината докторска дисертација. Анете Шаван најави тужба против одлуката.
По разговорот со Меркел во владиниот кабинет, Шаван изјави дека ниту препишувала ниту мамела, објавува Дојче веле.
57-годишната Шаван важи за близок соработник и човек од доверба на Меркел и министерка за образование е од 2005 година.
Првите обвинувања за плагијат на нејзината докторска дисертација се појавија анонимно на интернет кон крајот на април 2012 година.
Шаван постојано ги негира обвинувањата за плагијат и препишување на докторскиот труд од 1980. година, а проверката од страна на Универзитетот сама ја побара.