Генералниот директор на Ватиканската банка Паоло Киприани и неговиот заменик Масимо Тули си поднесоа оставки од своите функции по финансискиот скандал што се прошири низ Ватикан.
Челниците на банката своите оставки ги поднеле по апсењето на еден од сметководителите на Ватикан, кој беше обвинет за шверцување на 26 милиони долари во торби, со помош на италијански шпион.
Пред неколку дена папата Францис основаше посебна комисија која го истражува работењето на банката, по минатонеделното апсење на монсињор Нунзија Скарана, италијански свештеник од Салерна, вработен во ватиканската финансиска управа.
За вршител на должноста на генерален директор поставен е претседателот на банката Ернст вон Фрејберг, а во банката наскоро би требало да вработат и директор за ризици чија главна задача ќе биде банката да ја доведе во ред.
Сепак, Ватиканската банка остана под контрола на јавниот обвинител, а папата Францис изрази загриженост дека Банката се користи како оф-шор „даночен рај“.