Поранешниот директор за буџет во албанското Министерство за одбрана, Арменд Тартари, кој е осуден на една година затвор за трагедијата во фабриката во Грдец, доби политички азил во Франција, соопшти неговиот адвокат.
Како што јави дописникот на МИА, Тартари станал азилант по една година мината во камп за бегалци во Франција, каде заминал иако во Албанија е осуден на казна затвор во траење од една година, поради злоупотреба на службената положба.
Шест години по експлозија во фабрика за демонтирање на муниција, што се случи на 15 март 2008 година и во која загинаа 26 лица, а над 300 беа повредени, Тартари е втор висок функционер осуден во овој случај кој добива политички азил.
Претходно, лани во декември политички азил во САД доби поранешниот началник на Генералштабот на Албанската армија Љуан Хоџа, кој е осуден на шест години затвор. Тој за САД заедно со семејството замина последните денови од 2012 година и покрај тоа што во тек беше судскиот процес против него.
Во судскиот процес „Грдец“ беа осудени и други лица, но иако нивните пресуди ги потврди и Апелацискиот суд во Тирана, досега ниту еден од нив не е зад решетки.