Граѓанската иницијатива „Осветли го Скопје“ утре го организира традиционалното ноќно искачување на Водно, на полна месечина.
Организаторите ги повикуваат сите кои сакаат да се придружат на ноќното искачување да бидат присутни во 17 и 30 пред основното училиште „Кочо Рацин“, каде ќе биде стартот и крајот на зимската планинарска авантура.
Патеката по која ќе се движат учесниците е долга околу 5 километри и за нејзино искачување се потребни околу 2 часа.
Организаторите препорачуваат оние кои не се во физичка подготвеност да се придружат на искачувањето од кај фонтаната на Средно Водно во 18 часот и 10 минути.
Искачувањето ќе има само една официјална пауза од десетина минути на Средно Водно.
Настанот се очекува да заврши во 23 часот.
Учеството на настанот е бесплатно, а организаторите советуваат учесниците да понесат со себе соодветни зимски чевли за пешачење, батериска ламба, топла резервна облека, вода и храна.
Организаторите потенцираат дека секој учесник е на своја одговорност.