Откриена мистеријата – „Адидас“ кампања за СП 2014?

Почна од Рио де Жанеиро на 20 октомври месецов, потоа се појави во Лондон, па се пресели во Њујорк. Мистериозниот знак во саботата се појави и во Германија. Единаесет луѓе облечени во иста, црна, мистериозна облека присуствуваа на Алианц Арена во Минхен, на последниот натпревар на европскиот шампион Баерн Минхен против Херта од Берлин. За време на натпреварот, сите 11 се забележани како прават синхронизирани гестови за време на мечот, кој Баерн го доби со резултат 3-2.

Според светските медиуми, мистериозниот симбол во Рио де Жанеиро, Лондон и Њујорк, и луѓето кои присуствуваа на натпреварите на Алианц Арена во Минхен, на Стемфорд Бриџ во Лондон, и на Јувентус стадионот во Торино, се дел од новата маркетинг кампања на „Адидас“ пред претстојното Светско Првенство во Бразил.

Сместени на само шест реда оддалечени од теренот, во средината на трибините, мистериозните луѓе предизвикаа различни реакци кај ТВ гледачите и присутните.

Еден од фановите, Торстен Шмит изјави: „Многу беше чудно, седеа мирно долго време и одеднаш ќе се фатеа за раце, ќе направат по некој гест и пак ќе седнат. Сите околу мене беа збунети. Некои се смееја, некои беа вчудоневидени. Беше многу чудно“.

Симболот од нивната облека е виден на неколку локации ширум светот, почнувајќи со холограм во Рио де Жанеиро. Пораката со секој симбол гласи: #WINNERTAKESEARTH („Победникот ја освојува Земјата“).