Во скопското основно училиште „Владо Тасевски“ денеска воопшто не се одржа екстерното оценување. Според професорите со кои разговораше НОВА, во ова училиште прво се доцнело, а потоа е сосема одложено, затоа што паднала софтверската програма со тестовите. Наставниците, родителите и учениците не се информирани кога ќе се одржи тестирањето во ова училиште.
Од утринава има информации дека и покрај најавите дека екстерното тестирање теба да се спроведе истовремено во сите основни и средни училишта, имало доцнење, не функционирал софтверот со прашањата од тестовите и други неправилности.
За доцнења информираат во гимназиите „Раде Јовчевски Корчагин“ и „Никола Карев“, скопските основни училишта „Љубен Лапе“, „Лазо Трпевски“, додека во училиште во светиниколско, на учениците и наставниците им било кажано дека тестирањето ќе се одржува во 16 часот попладнево.
Во анкетата на НОВА, учениците реагираат дека имале прашања кои не биле опфатени со наставната програма, дека имале само 5 училници опремени со компјутери.
Според Министерот за образование, во одделни училишта се појавиле само мали технички проблеми кои ги решава тим од триесетина експерти во специјален кол центар во Министерството.
Резултатите од екстерното тестирање ги собира и проверува Државниот испитен центар, чија директорка Емилија Угриновска изјави дека онаму каде ученикот нема да има оправдано отсуство ќе има казни, една од нив е тоа што нема да добие свидетелство
Според планот на Министерството за образование, полагаат 200.000 основци и средношколци по два предмета, а опфатени се околу 15.000 наставници.
За 60 минути учениците треба да одговорат на 30 прашања. Учениците кои од оправдани причини нема да присуствуваат на екстеното тестирање од 27.05-10.06, ќе имаат можат да полагаат есктени тестови во наредните две сесии од 17 до 21 јуни или од 15 до 21 август.
Оценките кои ќе ги добие ученикот од двата предмета ќе бидат впишани во сведителството и ќе влијаат на вкупниот успех. Во сведителството ќе стојат и оценките кои ученикот ги добил по тие предмети и од наставникот.
Инаку, минатата недела во повеќе градови во државата учениците и родителите протестираа против екстерното оценување, имаше и инциденти и обиди за политизирање на протестите.