Ники Лауда повторно во болница. Поранешниот шампион во Формула 1 е хоспитрализиран во Австрија поради проблеми со дишењето. Пред околу шест месеци, тој беше подложен на трансплантација на белодробно крило, а овојпат е ставен под постојан лекарски надзор на одредено време за спречување на евентуални компликации од грипот што го нападна.
Легендарниот австриски тркач е на возраст од 69 години, се наоѓа во фаза на постоперативно лекување по зафатот кон средината на 2018 година и , според австриските медиуми, се очекува да продолжи на домашна нега при крајот на оваа недела.
Лауда е трикратен шампион во Формула 1, а покрај тоа ќе остане запаметен и по стравичната несреќа на патеката „Нирнбургринг“ во Германија во 1976 година и тешкиот судир од кој излезе со изгореници. Пред да биде извлечен од болидот, вдиша токсични материи што доведоа до оштетување на белите дробови.