Ватикан соопшти дека папата Франциско (86) бил примен во болница во Рим на однапред закажани медицински прегледи, без да даде дополнителни детали.
„Светиот Отец од попладнево е во болницата Џемели на некои однапред планирани прегледи“, напиша во соопштението портпаролот на Ватикан, Матео Бруни.
Неколку часа подоцна, Ватикан објави дека на папата Франциско му била дијагностицирана респираторна инфекција и дека ќе му треба „неколку дена соодветно болничко лекување“.
Папата, кој претходно овој месец одбележа 10 години како поглавар на Католичката црква, претходно се појави расположен на својата неделна аудиенција во Ватикан, насмеан додека ги поздравуваше верниците од својот „папамобил“.
Сепак, тој бил забележан како прави гримаси од болка додека му помагале да влезе во возилото.
Папата Франциско страда од хронична болка во коленото, која во последните месеци го принуди да користи инвалидска количка, пренесе Франс прес.
Џемели е истата болница во која на папата му беше извршена операција на дебелото црево во јули 2021 година, откако страдаше од еден вид дивертикулитис – воспаление на слузницата на цревата. Во болница остана 10 дена. Една година подоцна, во јули 2022 година, тој призна дека сè уште ги чувствува последиците од шест часа поминати под анестезија за време на операцијата.