Македонскиот ПЕН центар со големо исчудување ја прими веста за лустрацијата на еден од своите оснoвачи и носечки столбови на македонската литература и култура Славко Јаневски.
Дотолку повеќе што станува збор за автор, мртов повеќе од една деценија, за автор кому токму власта што го лустрира, пред извесно време му откри два споменика – еден во Паркот „Жена борец“ друг на Мостот на уметноста, реагира преку соопштение Македонскиот ПЕН центар.
-Македонскиот ПЕН центар силно се противи на настојчивите обиди на Комисијата за лустрација самата да си се претвора во Комисија за утврдување на гревови од било кој вид, скршнувајќи од нејзината единствена и основна цел – оневозможување поранешните соработници на службите за безбедност да можат денеска да бидат носители на јавни функции.
Македонскиот ПЕН центар не може да сфати со колкава леснотија Комисијата за лустрација се пресметува со мртви луѓе кои не можат да се бранат и да ја докажат својата невиност, а за кои уште од римско време постои начелото – за мртвите не се расправа.
Не сакајќи да навлегува во наводите на Комисијата, која со ова го достигнаа врвот на апсурдот, Македонскиот ПЕН центар потсетува дека вредносната скала во уметноста не ја прават никакви комисии и силно ја подвлекува незаобиколната и незаменлива улога на Славко Јаневски во развојот на македонската литература и култура.
Едновремено, енергично бараме од надлежните државни органи да ја вратат работата на оваа Комисија во нејзиниот законски делокруг, се вели во соопштението на ПЕН, за лустрирањето на писателот Славко Јаневски.