Шефот на државата упати личен апел до приватните болници да ги намалат цените за лекување на ковид-пациентите и им порача дека никој не треба да ги искористува личните трагедии за профит
За да нема сомнеж за злоупотреби, на Советот за безбедност е договорено функционерите да се пријават за вакцинација преку веб-страницата на Министерството за здравство и да се вакцинираат тогаш кога ќе им дојде редот, како и на сите други граѓани
Вакцинирањето мора да се спроведе во најдобар ред и така да остане до целосна имунизација на населението. Прекини во процесот не смее да има – ова го побарал шефот на државата Стево Пендаровски на седницата на Советот за безбедност. Тоа што немаше вакцини, па граѓани изминатиот викенд масовно одеа во Србија да се вакцинираат, рече претседателот, е срам за државата.
„Такви слики едноставно не може да се повторат. Благодарност до Србија, но тоа беше срам за нашата држава. Едноставно државата мора да пружи здравствена заштита тука. Точно е дека се потпиравме на Ковакс, кој задоцни 2 месеци, точно е дека верувавме во Солидарниот фонд на ЕУ, точно е дека од 5 најбогати членки на ЕУ ниту една нема вакцинирано ниту 5% од населението, точно е дека според СЗО околу 80 проценти од вакцините се распоредени во 10 земји во светот. Но тоа нашите граѓаните не ги интересира“, изјави Пендаровски.
Претседателот рече и дека здравствените капацитети се искористени до максимум, но државата не смее да дозволи ниту еден наш граѓанин да не биде примен на болничко лекување. Од министерот Венко Филипче, пак, добил уверување дека такво нешто не се случило досега ниту ќе се случи во иднина.
„Сакам да упатам и еден личен апел – да ги повикам приватните здравствени установи да се откажат од профитот за да ги направат нивните услуги подостапни за граѓани и ако има потреба да го упатуваат својот персонал во јавните здравствени установи. Не треба лични трагедии да ги користиме за лични бенефити“, рече Пендаровски.
Во однос на вакцинацијата на државниот врв и на другите функционери, шефот на државата рече дека на денешната седница се договориле, за да нема сомнеж дека некој ја злоупотребил позицијата, секој да се пријави за вакцина на интернет-страницата на Министерството за здравство, како и секој друг граѓанин на државата и да биде вакциниран тогаш кога ќе му дојде редот.
Денешната седница на Советот за безбедност беше 12. по ред. Советот е највисокото советодавно тело во државата и ги разгледува прашањата сврзани со безбедноста и одбраната на Републиката и дава предлози на Собранието и на Владата.
Денеска, покрај редовните членови, присуствуваа и министерот за здравство Венко Филипче и директорот на Агенцијата за национална безбедност (АНБ), Виктор Димовски.
Негови редовни членови, покрај шефот на државата, се и: претседателот на Собранието Талат Џафери, премиерот Зоран Заев, министерот за внатрешни работи Оливер Спасовски, министерката за одбрана Радмила Шекеринска, шефот на дипломатијата Бујар Османи, како и професорот на Правниот факултет „Јустинијан Први“ при УКИМ Ненад Марковиќ, професорот на Универзитетот на Југоисточна Европа, Ветон Љатифи и поранешниот министер за одбрана и универзитетски професор Трајан Гоцевски.