Просечните примања на пензионерите во државите од Балканот се значително пониски и од онака ниските просечни примања на останатите граѓани, а поголемиот дел од пензионерите немаат доволно средства ни за основни животни потреби, се вели во анализата на агенцијата Анадолија.
Од сите земји во регионот, но и повеќето земји од Европа, просечните пензии во Македонија и Босна и Херцеговина се значително најмали, а во тие држави најниски се и просечните плати.
Според податоците на Заводот за пензиско осигурување на Македонија, просечната пензија изнесува околу 144 евра. Според Заводот за статистика на Македонија, просечната плата во април годинава изнесувала 20, 983 денари, односно 342 евра, што ги прави просечните примања на пензионерите пониски за околу 200 евра од просечната плата.
Најголеми просечни пензии во регионот на Балканот имаат Црна Гора, односно Хрватска, каде се движат околу 300 евра.
Според податоците на црногорскиот Фонд за пензиско и инвалидско осигурување, во Црна Гора просечната пензија изнесува 278 евра. Просечната плата во мај, била 480 евра.
Најголема пензија на Балканот примаат хрватските пензионери, каде според последните податоци, просечната пензија во Хрватска изнесувала 2,334 куни, односно 310 евра. Според Заводот за вработување на Хрватска, во првите три месеци оваа година, просечната плата во најновата членка на ЕУ, изнесувала 5, 399 куни, односно 718 евра.