Претседателот на Русија, Владимир Путин, ќе го формулира својот став за одржаниот референдум во неделата во украинскиот регион Донецк врз основа на „силата на овие резултати“, истакнал портпаролот на Путин, Дмитриј Песков.
„Каква ќе биде одлуката на претседателот „тешко е да се предвиди”, рекол Песков, пренесува руската агенција „Итар Тас”.
На прашање дали врз ставот на Путин ќе има влијание и тоа што токму тој самиот побара од федералистите да го одложат референдумот, Песков нагласил дека рускиот претседател „ништо не побарал туку препорачал”.
„Меѓутоа, беше тешко да се испочитува ваквата препорака, па дури и со огромно влијание на рускиот претседател. Со оглед на реалните воени акции, жителите беа принудени да делуваат според својот план во однос на актуелната ситуација”, нагласил Песков.
САД и ЕУ соопштиле дека не ги признаваат резултатите од референдумот и предупредиле дека ќе воведат нови економски санкции за Русија доколку украинските претседателски избори, закажани на 25 мај, бидат загрозени поради гласањето на истокот во Украина.
Песков рекол дека забелешките на САД и ЕУ кои паѓаат на сметка на Русија се „апсолутна глупост”.
„Зошто запад не можеше да спречи употреба на оружје во Славјанск и Краматорск и да спречи убиства на цивили? Тие не го искористија своето влијание ниту пак им е грижа додека Русија е виновна за се”, рекол Песков.
Проруските сили во регионот на Донецк во Украина прогласиле победа на референдумот за независност кој беше одржан во неделата, бидејќи скоро 90 отсто од гласачите се изјасниле за независност