Исчезнатото дете Петар Џобоски утре од рано изутрина ќе се бара и во напуштениот рудник „Партизанка“ – спасителите планираат да се спуштат во окно длабоко и до 100 метри, а во кое никој не влегол веќе 40 години.
Ова е единственото неистражено место околу прилепското село Врбско во изминатите пет дена, колку што трае потрагата по детето. Рудникот се наоѓа покрај пат и на само 3,5 километри од селото, кадешто живее 10 годишниот Петар, на кој му се губи трага од петокот. Од МВР потврдуваат дека потрагата трае.
Дарко Неданоски е спелеолог и е еден од спасителите од службата „Златоврв“, која заедно со останатите служби од почетокот е во потрага по детето, а кои ќе го бараат Петар и во окното од рудникот, каде и вчера се упатиле, но застанале…
– Сметовите од снег вчера ги сопреа и џиповите на половина пат и не успеавме да стасаме до рудникот, снегот беше дури до шофершајбната. Таму се наоѓаат стари окна од рудникот Партизанка, каде на времето го ваделе минералот фелцпат.. Тие окна се дупки како бунари, а длабоки се 50 метри, некои тврдат можеби дури и 100 метри, во кои рударите влегувале и ваделе суровини. Но повеќе од 40 години никој не влегол таму. За да влеземе неопходни ни се и боци со кислород, поради опасноста од јаглерод моноксид и јаглерод диоксид, но и сета друга опрема за спуштање, над 300 метри јажиња, шлемови… вели за НОВАТВ Неданоски, кој е и претседател на Спелеолошката федерација на Македонија.
Дарко Неданоски, спелеолог
Спасителите веднаш побарале и моторни санки од Дирекцијата за заштита и спасување за да можат да стасаат до рудникот којшто е на само 2 километри воздушна линија од селото и каде, според претпоставките, и пеш би можел да стаса Петар, особено што рудникот се наоѓа покрај патот.
– Постојано сме во соработка со МВР и сакаме максимално да помогнеме во оваа многу тешка ситуација во која исчезна детето Петар, вели Неданоски, кој е спелеолог веќе 19 години, а најдалечната точка каде успеал да се спушти е на минус 950 метри.
– Тоа беше учество во истражување во Словачка јама на Велебит. Искуството оттаму, но и од другите експедиции е драгоцено и се надевам ќе ни помогне во утрешната спасувачка акција. Од се срце се надеваме да биде успешна, вели Дарко.
Дирекцијата за заштита и спасување ги засилила тимовите влучени во потрагата со стручни лица и од Македонски Брод и од Тетово, освен со колеги од Битола, Прилеп и Скопје.
– Решивме да ги ангажираме нашите сили и од овие два града, а обезбедивме и моторни санки и специјални возила и спасителите утре ќе почнат со потрага од 8 часот. Тие и вчера беа ангажирани, но не можеле да продолжат поради временските услови, ни рече Севгани Ибрахими, раководител на одделението за организациски работи во Дирекцијата, чии тимови од вчера се приклучија во истрагата.
Сметовите од снег вчера ги сопреле и џиповите (ФОТО: Служба Златоврв, Прилеп)
Денеска е пети ден од потрагата по 10 годишното дете кое, како што веќе објавивме, исчезна во петокот попладне, кога, според пријавата на таткото Стојан, се оддалечило од својот дом во Врбско.
Повеќе од 100 полицајци, противпожарни и спасителни служби, ловџии, но и граѓани доброволци од неколку градови се во потрага по Петар, а во која беше вклучен и хеликоптер, но и со дрон се снимаше теренот каде се бара детето.
Прилепското Основно јавно обвинителство завчера отворило предистражна постапка за исчезнувањето на десетгодишниот Петар Џ.
Љубица Балабан