Како министер за правда, но пред се како човек и родител не можам да бидам рамнодушен по одлуката на судот, кој пресуди условна казна за сообраќајката во Охрид по која две момчиња починаа, а три девојки беа тешко повредени, напиша на „Фејсбук“, министерот за правда, Бојан Маричиќ.
– Очекувам праведна одлука на повисоките судови, а Судскиот совет будно да го следи целиот случај, напиша Маричиќ.
Инаку, сообраќакјата се случи во август минатата година во Охрид, кога автомобил Голф во обид да престигне друго возило, Фолксваген, со брзина од 106 км/ч, наместо 60 колку што е дозволено, удрил во Цитроен Ц3 со кој управувал Иван Корач, на местото каде регионалниот пат се вкрстува со спореден пат од комплексот Инекс. По ударот, Цитроенот се забил во билбордот од десната страна на патот, а Голфот во оградата од левата страна. По сообраќајката животот го загубија двајца битолчани, а три девојки беа потешко повредени.
За овој случај судот во Охрид донесе условна пресуда од две години затвор за возачот на автомобилот Голф, 24-годишниот Антонио Ангеловски, доколку во наредните четири години не стори ново кривично дело. Оваа пресуда ја изрече судијата Бојан Мартиноски од Основниот суд во Охрид.
Иницијативата „Правда за Иван и Милан“ очекува разумна одлука од Апелациониот Суд во Битола.