Божидар Димитров, бугарскиот професор, историчар и археолог, поранешен директор на Агенцијата за Бугарите во странство и поранешен директор на Националниот историски музеј, познат пропагатор на ставовите за бугарскиот идентитет на Македонците, починал во Софија на 72 годишна возраст, јавија бугарските медиуми.
Тој починал вчера пред 20 часот пред зградата во Софија во која што живеел. Во еден момент се фатил за градите, а потоа се струполил.
Димитров по осамостојувањето на Македонија многу пати во јавните настапи се залагаше за тезата за еден етнички идентитет на Македонците и Бугарите, а издаде голем број статии и публикации во кои ја бранеше својата теза со разни историски случувања во последните милениум и половина.
Димитров ја извршуваше и функцијата министер без ресор, одговорен за Бугарите во странство во првиот кабинет на премиерот Бојко Борисов.
Доказ дека македонскиот и бугарскиот се еден народ за Димитров беше минатогодишното поклонување на премиерот Зоран Заев на споменикот на Самоил во Софија, пред потпишувањето на Договорот за добрососедство.
Димитров тогаш изјави дека спроведувањето на Договорот ќе означи крај на македонизмот и навистина претворање на Македонија во втора бугарска држава и дека ако учебниците по историја бидат напишани „како што треба“ тогаш Македонците ќе учат бугарска историја.