Eден од најзначајните и најголемите рок-музичари, во петокот, на 8 јануари, на денот на својот 69 роденден го промовираше и својот последен албум. После три дена почина по тешката битка со рак.
Боуви почина во неделата опкружен со членови на семејството, соопштија неговите претставници. Музичката икона наполни 69 години во петокот, истиот ден кога беше објавен неговиот 25-ти студиски албум „Блекстар“.
„Дејвид Боуви почина мирно денеска (недела) опкружен со семејството по 18-месечна тешка и храбра битка со ракот“, се наведува во кусата порака на неговите социјални профили.
Филмскиот режисер Данкан Џонс, син на Боуви од првиот брак со Анџела Боуви, ја потврди веста на Твитер.
Роден како Дејвид Роберт Џонс во Брикстон, јужен Лондон на 8 јануари 1947. Во првата од многуте преобразби си го смени името во Дејвид Боуви во 1966 година за да избегне конфузија со Дејви Џонс- водечкиот вокал на групата Д Манкис, а студирал и будизам.
1970-те, декадата во која тој целосно доминираше на британската музичка сцена а ги освои и САД- донесоа серија успешни албуми.
Започна со „Ханки Дори“ (“Hunky Dory”) кој беше многу ценет од критиката, продолжи со „Подемот и падот на Зиги Стардаст и пајаците од Марс“, па следуваа рок-албумот “Aladdin Sane”, апокалиптичниот “Diamond Dogs”, и играта со ткн. пластичен соул преку “Station to Station”.
Потоа повторно го смени жанрот, по преселбата во Берлин и соработката со електронскиот експерименталист Брајан Ено од која произлегоа албумите- “Low”, “Heroes” and “Lodger”.
Во 1980-те ја освои новата генерација со албумот “Let’s Dance”, од кој произлегоа хитовите како “China Girl” и “Modern Love”.
Неговата смрт го означува крајот на еден од најценетите уметници на модерната британска музика, со кариера која започна со хитот “Space Oddity” во 1969 година, за астронаут по име Мејџор Том, кој е напуштен во вселената. Неговата музика опфаќаше најразлични стилови од глам рок, Њу Романтик, Краутрок и денс музика, па се до алтернативен рок, соул и хард рок, комбинирано со неверојатна мешавина од личности почнувајќи од сексуално амбициозниот Зиги Стардаст до ткн. Тин Вајт Дјук.
Токму портретирањето на бисексуалниот вонземјанин Зиги Стардаст во 1972 му донесе светска слава. Во истата година во едно интервју Боуви изјави дека е хомосексуалец. Четири години подоцна за „Плејбој“ рече дека е бисексуалец, но во 1980-те за „Ролинг Стоун“ призна дека тоа признание „било најголемата грешка која воопшто ја направил“ и дека всушност отсекогаш бил тврд хетеросексуалец.
Неговиот хедонистички стил на живот го чинеше неговото здравје. Го призна нездравиот апетит за кокаин со изјавата „Еднаш во Калифорнија си го разнесов носот, но и половина мозок. Морав нешто да сторам“. Откако му беше извршена операција на срцето во 2004 година, Боуви се повлече од јавните настапи.