Вечерва во Белград на 64-годишна возраст почина генералниот директор на Радио-телевизија Србија, Александар Тијаниќ.
Безживотно тело беше пронајдено на улицата Михајло Пупин, кај предниот дел на зградата каде што живеел во Нов Белград. Тијаниќ имал претходно проблеми со срцето и дијабетес. Како неофицијално информираат српските медиуми, Тијаниќ последниот ден од животот го поминал на работното место.
Портпаролката на Служба за итни случаи Нада Мацура изјавила дека Тијаниќ бил пронајден во предниот дел на зградата, во несвесна состојба, околу 17:10 минути и дека Брзата помош се обидела со реанимација, но безуспешно.
Мацура не била во можност да ја каже причината за смртта.
Александар Тијаниќ е роден на 13 декември 1949 година, во Ѓаковица. Тој живеел во Подуево и Приштина. Оставил зад себе две деца, ќерката Зара и синот Стефан.
Својата новинарска кариера ја започна во неделникот НИН, по што станува уредник на списанието „Интервју“.
Тијаниќ е основач на телевизијата „Политика“, а во 1994 година го презема директорското место во БК телевизија.
Беше политички советник на одредени личности во поновата српска политика, како о Министер за информирање четири месеци во владата на чело со Мирко Марјановиќ за време на владеењето на Слободан Милошевиќ.
Неговата политичка но и подоцна новинарска кариера често се анализира во контекст на министерувањето во време на Милошевиќ, како и на неговите изјави за Зоран Ѓинѓиќ- “Ако преживее Зоран Ѓинѓиќ, Србија нема да преживее”- изјава во Е-новине, со наслов “Људи Који су убили Зорана Ѓинѓиќа”.
Во РТС, како генерален директор е поставен во 2004 година и е избран во два мандата.