Триесет и тригодишна родилка од Тетово починала од нестручно изведено породување во тетовската болница, а бебето се наоѓа во критична состојба, обвинува семејството.
За случајот се води истрага, а гинекологот кој ја вршел интервеницијата е суспендиран од работа додека не заврши истрагата.
Ноќта меѓу 19 и 20 август на одделението за гинекологија во болницата во Тетово се случувала вистинска драма, раскажува за НОВА, член на потесното семејство. Породувањето со царски рез на В.К започнало во 21 часот и траело до полноќ, но поради обилно крварење и компликации во 3 часот изутрината била направена уште една операција.
.jpg)
Фотографија од Гинеколошкото одделение во тетовската болница објавена на порталот Инбокс7
Поради лошата здравствена состојба во која западнала, младата жена била префрлена на скопските клиники на КАРИЛ, каде во 8 часот изутрина била повторно оперирана.
Родилката починала по неколку дена поминати на апарати за дишење на одделението за интензивна нега.
„Ни кажаа дека настанало тешко оштетување на мозокот поради обилното крварење и недостаток на крв во мозокот. Се уште го чекаме наодот од обдукцијата, по што ќе ги преземеме сите потребни мерки да биде казнет виновникот“, велат за НОВА од семјството на починатата родилка, но се уште, во оваа фаза, не сакаат да се појават јавно.
Хирургот кој што ја извршил последната операција во Скопје, не сакаше да го коментира случајот, најавувајќи дека ќе има судски епилог.
Бебето утредента по породувањето било префрлено на Клиниката за детски болести и се наоѓа во критична состојба.
„Бебето е се уште на апарати за дишење, тешко оди одвикнувањето самостојно да започне да дише. Испратена е крв за анализа, за да се испита дали има вроден гентски синдром бидејќи има недоволно развиени бели дробови и ребра, но тоа нема врска со породувањето по кое почина неговата мајка“, велат на Клиниката за детски болести.
Семејството на починатата родилка случајот веднаш го пријавиле во полиција, а обвинителество покренало истрага.
Гинекологот кој ја породил младата жена е привремено суспендиран од работа додека не заврши истрагата. Ова за НОВА го потврди директорот на болницата во Тетово, Фљорим Бесими. Тој изјави дека веднаш по првата операција поради обилното крварење била направена втора, кога била извадена матката. Но и покрај тоа нејзината здравствена состојба се влошила, по што била префрлена на КАРИЛ.
„Обвинителството ја зеде целокупната медицинска документација и веќе води истрага. Напоредно со тоа, ние формиравме дисциплинска комисија која одлучи гинекологот да биде суспендиран од работа додека трае постапката. Комисијата проверува дали има лекарска грешка или пропуст. Очекуваме да дојде и тим од Скопје од Клиниката за гинекологија, формиран од Министерството за здравство“, изјави за НОВА Бесими.
Тој нагласи дека секоја недела се води постапка, за некој лекар во болницата во Тетово. Објасни дека, дали заради свеста на граѓаните или нешто друго, постојано се пријавуваат нови случаи кои се разгледуваат на стручните состаноци.
Бесими вели дека се покренуваат постапки, а има и случаи каде се сомневаат на пропусти во лекувањето. Ова не прв случај на смрт на родилка во Тетово, а и воопшто во државата. Во 2010 година во истата болнива на породување починаа и родилка и нејзиното бебе. Не е познат судскиот епилог за овој случај. Се шпекулира дека станува збор за истиот лекар.
Што ќе покаже истрагата за 33-годишната родилка која не успеа да го виде своето новороденче, останува да се види.