Рускиот физичар и нобеловец, Жорес Алферов почина денеска во 89. година од животот. Негово откритие е технологијата што подоцна овозможи создавање на ласерски плеери и дискови, мобилни телефони, соларни батерии и ласерски „скалпели“. Има заслуги и за откривање на оптичките влакна без кои интернетот е невозможен, но и многу други вселенски технологии.
Поради своите откритија Алферов заедно со Херберт Кремер во 2000 година ја доби Нобеловата награда за физика за „развој на полупроводни хетероструктури користени во оптоелектрониката и електрониката со големи брзини“.
Тој беше заменик претседател на Руската академија на науки (РАН) од 1991 година до 2017 година, а воедно и претседател на Президиумот на научниот центар на РАН во Санкт Петербург. Во исто време беше и пратеник од Комунистичката партија на Русија во Државната дума.