Слависти, македонисти, научници, историчари, етнолози, студенти од универзитети од дваесетина земји од светот ќе ги изучуваат нашиот јазик, култура, историја, литература на традиционалниот меѓународен Семинар за македонски јазик, кој од денеска до 28 јуни се одржува во Охрид.
Од 89 слависти и македонисти од 23 земји, најмногубројни и годинава се учесници од словенските земји, како Русија, Полска, Словенија, Украина, како и од Србија, Хрватска, САД и од западноевропските земји во кои постои интерес за нашиот јазик и култура. Меѓу учесниците има по неколку слависти од Јужна Кореја, Кина, а првпат годинава ќе има и учесник од Финска. Семинарот е во организација на Семинарот за македонски јазик, кој работи во рамките на Универзитетот „Св. Кирил и Методиј“.
Според организаторите, главни цели на Семинарот се да се зголеми интересот за македонскиот јазик и промоција на македонската култура во светот.
Македонскиот јазик се изучува на 11 лекторати низ светот и во 28 центри во форма на катедра или институт. Лекторатот во Киев минатата година доби дозвола за финансирање од Министерството за образование и наука. УКИМ го финансира лекторот во Грац, Австрија.
Директорот на Семинарот за македонски јазик, литература и култура, Максим Каранфиловски, рече дека нам не ни недостигаат македонисти што ќе може да работат во нови центри, туку треба да се изгради партнерство меѓу универзитетите.
Централно место на Семинарот за македонски јазик ќе имаат курсевите за македонски јазик и лекторските вежби. Ќе бидат застапени повеќе теми поврзани со нашата историја, култура и нација. Ќе има и курс за преглед на македонската литература и на историја на македонскиот јазик.
Вообичаено, гостите од странство ќе имаат можност да ги учат и македонските ора и македонските народни песни. И годинава преведувачката работилница продолжува со работа, а на неа ќе се работи превод од руски, англиски и полски на македонски јазик.
Буџетот за Семинарот по македонски јазик изнесува 3 милиони денари од УКИМ и еден милион од Министерство за култура.