„Скопје танцовиот театар“ почна со работа на програмата за 2013 година, како прва современа танцова компанија во Македонија.
-Минатата година, „Интерарт“ културниот центар и Министерството за култура потпишаа тригодишен договор за соработка, преку кој ќе се финансира програмата на овој единствен танцов театар кај нас и со кој се промовира поддршката на државата на претприемништво во културата, вели Рисима Рисимкин, уметнички директор на театарот.
Еден од првите гости на програмата во Скопје е Тим Персент, кој работи со танчерите на Скопје танцовиот театар.
Тим Персент е врвен танчер, кореограф и педагог. Тој се здобива со балетско образование во престижната Ballet Rambert School во Лондон, а веќе долги години работи и живее во Холандија, каде што постигнува завидна кариера и важи за еден од најдобрите танчери на својата генерација. Во рамките на минатогодишниот интернационален фестивал од светско значење Holland Dance Festival во Хаг, Холандија, тој имаше вечер посветена на неговото дваест и пет годишно творештво на интернационалната современа сецена. Во 2004 година ја добил престижната награда Златен лебед (Gouden Zwaan Dansprijs), која важи за најважна награда од областа на танцот во Холандија, а која до сега ја добиле уметници од рангот на Јири Килијан, Ханс ван Манен, Начо Дуато, Кристина де Шател, Ед Вуб, Руди ван Данцинг и др.
Тим Персент е и уметнички директор на фестивалот ИТС фестивал од Амстердам, кој годинава ќе се одржи по 24 пат и кој важи за еден од најважните фестивали во Холандија. Тој веќе подолго време е дел од танцовата компанија “LeineRoebana“, која работи под раководство на кореографското дуо Andrea Leine и Harijono Roebana, чии претстави се изведуваат ширум Европа и во Индонезија, Канада, Танзанија, Русија, Бразил и САД.
Покрај работата на современите танцови техники, Тим Персент работи со танчерите на Скопје танцовиот театар и на поставување нова кореографија.