Со мечевите во групите А и Б во Хелсинки, односно, Тел Авив, стартува 40. издание на Европското првенство во кошарка во машка конкуренција што и овојпат ќе се игра во четири држави. Покрај Финска и Израел, домаќини на група се и Турција и Романија. Шампионатот ќе трае до 17 септември со завршните дуели во Истанбул.
Шпанија е во улога на бранител на титулата и со шесте НБА кошаркари важи за најголем фаворит за првото место ако се имаат во предвид многуте откажувања, дел поради пензионирање, а дел поради повреди, во селекциите како Србија (без Теодосиќ, Калиниќ, Недовиќ, Симоновиќ, Радуљица) и Франција (без Паркер, Козер, Батум и Гобер). И Србите и Французите, сепак, имаат материјал за висок пласман и се надеваат на место на Фајналфорот во „Синан Ердем Дом“.
Грција има солиден состав иако е без Јанис Адетокумбо, но играше по принципот „топло-ладно“ во контролните настапи. Кошаркарскиот тим на јужниот сосед допатува на турнирот и со нарушени меѓучовечки односи по тепачката меѓу играчите во подготвителниот период, па останува да се види дали и какви последици ќе остави сето тоа во играта на селекцијата што има две злата од ЕП.
Прашањето што го поставуваат Германците е како без Дирк Новицки во иднина. Одговорот ќе добијат на шесте меча во групата Б во Тел Авив меѓутоа, покрај легендата на Далас Маверикс, во тимот ги нема и Плајс, Ципсер, Цирбес, па голем дел од товарот ќе падне врз НБА ѕвездата, Денис Шредер.
Енигма е што и колку може Италија без Барњани и Џентиле, го нема ниту Галинари. Надежи, во нивно отсуство, се полагаат во Белинели, Мели и извонредниот Луиџи Датоме, клупскиот колега на Перо Антиќ од Фенербахче.
Како фаворит за највисок пласман важат Израелците кои ќе настапат во најсилнот состав што го имаат на располагање. Лидерската улога ја има Омри Каспи од Лос Анџелес Клиперс чија поддршка треба да бидат Гал Мекел, Јотам Халперин и и капитенот Гај Пнини. И, секако, Турција која ќе ужива неверојатна поддршка од своите фанови во групната фаза и во нокаут пресметките што ќе следуваат.
ЕП во кошарка – Турција, Израел, Романија, Финска
Денеска играат
Група А (Хелсинки), 1 коло
Словенија – Полска (12,45 ч.)
Исланд – Грција (15,30 ч.)
Франција – Финска (19 ч.)
Група Б (Тел Авив), 1 коло
Германија – Украина (14,45 ч.)
Литванија – Грузија (17,30 ч.)
Италија – Израел (20,30 ч.)